पहिले कोभिड महामारी र त्यसपछिको आर्थिक मन्दीले चपेटोमा परेको पर्यटन व्यवसायलाई चलायमान बनाउन बाँकेका होटल तथा पर्यटन व्यवसायीहरूले विभिन्न प्रयासहरू गर्दै आएका छन् । त्यसै प्रयासमा थपिएको छ, अंग्रेजी नयाँ बर्ष २०२४ को बिदाई र स्न २०२५ को स्वागत ।
आन्तरिक तथा बाह्य पर्यटकहरूलाई लक्षित गर्दै बाँकेमा रहेको होटल तथा पर्यटन व्यवसायीहरूले विभिन्न आकर्षक प्याकेजसँगै सांगीतिक एवं सांस्कृतिक कार्यक्रमहरू अघि सारेका हुन् । ‘पर्यटन व्यवसायलाई चलायमान बनाउन परिस्थिति सुधारको पर्खाइ भन्दा हामी आफ्नै अग्रसरतामा केही न केही गर्नु आवश्यक देखियो’, शनिबार पत्रकार सम्मेलन गरी नयाँ बर्ष स्वागतार्थ गरिएको कार्यक्रमबारे जानकारी दिंदै होटल स्टार लाइटका फ्रन्ट म्यानेजर विनोद बुढाथोकीले भने । उनको भनाइ थियो, ‘कम्तिमा आफ्ना नियमित पाहुनालाई नयाँ बर्षकै अवसर पारेर होटलसम्म ल्याउने र रमाउने वातावरणको सिर्जना गर्न खोजेका छौं ।’ त्यसका लागि होटल स्टार लाइटले सहुलियत तर आकर्षक प्याकेज तयार गरेको जानकारी दिंदै भने, ‘त्यो पनि सांगीतिक माहोलमा पारिवारिक वातावरण दिएर ।’
होटल स्टार लाइटका अपरेशन म्यानेजर रचित श्रेष्ठले लागत कष्टमा लाइभ फुड, अनलिमिटेड स्न्क्याक्स, बुफे डिनर सहित लोकप्रिय पप गायक सञ्जय श्रेष्ठ, लोकगायिका इब्सु सञ्ज्यालको देउडा संगीत अनि ‘द स्याड ब्यान्ड’को लाइभ प्रस्तुति व्यवस्थापन गरिएको पत्रकारहरूलाई जानकारी दिए ।श्रेष्ठले आन्तरिक तथा बाह्य पर्यटकहरूलाई व्यवस्थित बसाई सहित भिन्न र नयाँ प्रस्तुति होटल स्टार लाइटले दिन खोजेको दाबी गरे । ‘नयाँ पुस्तासँग पुरानो चर्चित ब्याण्ड तथा लोकप्रिय गायकहरूलाई चिनाउन पनि हाम्रो कार्यक्रमले विशेष भूमिका खेल्नेछ’, चार दशकमाथिका उमेरलाई लक्षित गरेर कार्यक्रमको आयोजना गरिएको संकेत गर्दै बुढाथोकीले पत्रकारसँग भने ।
डायमण्ड प्यालेस लर्डस् प्लाजाले बलिउड शैलीमा नेपालगन्जमै ‘न्यू इयर इभ’ आयोजना गर्ने जनाएको छ । ‘जहाँ संगीत, नृत्य र स्वागतको संगम हुनेछ,’ न्यू इयर इभबारे डायमण्ड प्लालेसले भनेको छ ।
नेपालगन्ज स्थित पाँच तारे होटल सोल्टीले पनि पत्रकार सम्मेलन नै गरेर सम्वत् २०२५ लाई भव्य रूपले स्वागत गर्ने जनाएको छ । सोल्टीले कलाज्ञ ब्याण्डलाई ३१ डिसेम्बर मध्यरातसम्मको रौनक दिन नेपालगन्ज निम्त्याएको जनाएको छ । त्यससँगै आफ्ना पाहुनाका लागि आकर्षक पुरस्कार समेत राखेको सोल्टीले लाइभबार, फुड काउन्टर जस्ता विशेषता सहितका आकर्षक प्याकेज तयार गरेको जनाएको छ ।
‘चर्चित गायक एकदेव लिम्बु र कलाज्ञले नेपालगन्जका पाहुनालाई छुट्टै आनन्दित बनाउने छन्’, सोल्टीले आफ्नो अपेक्षा प्रेस रिलिज मार्फत जारी गर्दै नयाँ बर्षको उत्सवलाई भव्यता दिन विभिन्न तयारीहरू गरेको जनाएको छ ।
शनिबार नै होटल सिद्धार्थ नेपालगन्जले प्रेस विज्ञप्ति मार्फत आफ्नो होटलले आयोजना गर्न लागेको न्यू इयर इभ २०२५ सेलिब्रेसनबारे जानकारी गराएको छ । होटलका सेल्स एण्ड मार्केटिङ्ग म्यानेजर नविन भट्टले रचना रिमाल सहितको सांगीतिक प्रस्तुतिबारे विज्ञप्ति मार्फत जानकारी दिएका हुन् ।
कोहलपुर स्थित पाँच तारे होटल सेन्ट्रल प्लाजाले पनि न्यू इयर इभलाई भव्यता दिंदैछ । सेन्टर प्लाजाले चर्चित गायक शिव परियार र पछिल्ला नेपाल आइडल करण परियारलाई ३१ डिसेम्बरको रात कोहलपुर निम्त्याएको छ । ‘बाँकेमा न्यू इयर भव्य बनाउन हाम्रो तयारी छ’, होटल सेन्ट्रल प्लाजाका सेल्स एण्ड मार्केटिङ्ग म्यानेजर गुइल्बर्ट डेनियलले दैनिक नेपालगन्जसँग भने ।
त्यस्तै, ग्यालेक्सी दरबारले लाइभ म्युजिक सहित विभिन्न परिकारहरूलाई सहुलियत दरमा आकर्षक प्याकेजिङ्ग गरेको जनाएको छ । जुना द टिम ब्याण्डको लाइभ म्युजिक आकर्षक खानाका स्वाद पस्किने न्यू इयर इभमा निःशुल्क प्रवेश व्यवस्था मिलाइएको ग्यालेक्सी दरबारका म्यानेजर हस्त बहादुर हिमालले जानकारी दिए ।
त्यस्तै, होटल कल्पतरुले पनि सन् २०२५ को स्वागतका लागि सांगीतिक कार्यक्रम सहित विभिन्न स्वादका परिकार पस्किने जनाएको छ । कल्पतरुले पत्रकार सम्मेलन गर्दै गायिका प्रतिक्षा सहित उनको ब्यान्डले डिसेम्बर ३१ मा अंग्रेजी नयाँ बर्षको स्वागत गर्ने जनाएको छ ।
