प्रगतिशील लोकतान्त्रिक पार्टी बाट बाँके क्षेत्र नं. ३ मा प्रतिनिधिसभा सदस्यका उम्मेदवार बनेका तेजप्रसाद भण्डारीले आफ्नो उम्मेदवारीविरुद्ध योजनाबद्ध रूपमा ‘नाटक मञ्चन’ गरिएको आरोप लगाएका छन् । दैनिक नेपालगन्जको कार्यालयमै आएका भण्डारीले केही व्यक्तिले आफ्नो उम्मेदवारी नै रोकिएको र अन्य पार्टीसँग समझदारी भइसकेको भन्ने हल्ला चलाएर मतदातामा भ्रम सिर्जना गर्न खोजिएको दाबी गरे । उनले नामनै लिएर आफुविरुद्ध लागेको भन्दै आलोचना गरे ।
‘मेरो उम्मेदवारी रोकेर अरू पार्टीसँग समझदारी गरिएको भन्ने कुरा सरासर झुटो हो,’ भण्डारीले भने, ‘यही भ्रम चिर्न म झन् सक्रिय भएर घरदैलोमा निस्किएको छु। मतदातासमक्ष प्रत्यक्ष पुगेर सत्य कुरा राख्ने अभियान सुरु गरेको छु ।’उनका अनुसार आफू पार्टीको जिम्मेवार नेता भएकाले व्यक्तिगत मात्र होइन, संगठनात्मक रूपमा पनि यस किसिमको भ्रमले दीर्घकालीन असर पार्ने खतरा देखिएको छ । ‘यो केवल मेरो विरुद्धको प्रहार होइन, पार्टीकै साखमाथि प्रहार हो,” उनले भने, ‘त्यसैले मैले पार्टी केन्द्रसँग पनि यस विषयमा छलफल गरिसकेको छु ।
’भण्डारीले पार्टी केन्द्रले प्रचार–प्रसारलाई अझ सशक्त र प्रभावकारी ढंगले अघि बढाउन निर्देशन दिएको जानकारी दिए । सोमबारदेखि जिल्ला नेतृत्वसमेत आफ्नै साथमा चुनावी अभियानमा खटिने गरी योजना बनाइएको उनले बताए ।
‘अब अभियान झन् तीव्र बनाउनेछौं,’ उनले दृढता व्यक्त गरे ।यसअघि नागरिक उन्मुक्ति पार्टी र प्रगतिशील लोकतान्त्रिक पार्टी बीच चुनावी समझदारी भएको र क्षेत्र नं. ३ मा प्रलोपा उम्मेदवार रोकेर नाउपालाई समर्थन गर्ने लिखित निर्णय बाहिरिएको भन्दै चर्चा चलेको थियो । उक्त विषय सार्वजनिक भएपछि भण्डारी आक्रोशित बनेका हुन्। उनले त्यसविरुद्ध पार्टी केन्द्रमा उजुरीसमेत दर्ता गरिसकेको बताए ।‘कुनै एक व्यक्तिको स्वार्थका कारण सिंगो पार्टी पंक्तिलाई भ्रममा पारेर राजनीतिक आन्दोलनलाई नै तिलाञ्जली दिन खोजिएको छ,’ उनले आरोप लगाए, “निर्वाचन परिणामबाट नै आफूलाई सही सावित गर्ने चुनौती स्वीकार गरेर अघि बढेको छु ।
’घरदैलो अभियानलाई तीव्रता दिँदै भण्डारी अहिले टोल–टोलमा पुगेर मतदातासँग प्रत्यक्ष संवाद गरिरहेका छन् । भ्रम र हल्लाभन्दा माथि उठेर आफ्नो एजेण्डा र प्रतिबद्धता जनतामाझ स्पष्ट राख्ने उनले बताएका छन् । चुनावी मैदानमा देखिएको यो आन्तरिक विवादले बाँके क्षेत्र नं. ३ को राजनीतिक सरगर्मीलाई केही चर्काएको उनको बुझाइ छ ।मङ्गलबार खजुरा जानकी र बैजनाथका मतदाता समाज आफ्नो एजेन्डा लिएर पुगेका भण्डारीले आफूलाई जिताइएमा संकल्प गरे अनुसारका प्रतिबद्धतालाई पूरा गरेरै देखाउने बताएका छन्।
