बाँकेमा नदीजन्य पदार्थको अवैध उत्खनन रोक्न जिल्ला समन्वय समितिले अनुगमन गरेको छ । बाँकेको राप्तीसोनारी गाउँपालिका अन्र्तगत राप्ती नदीका विभिन्न खोलाहरुमा अबैध नदीजन्य उत्खननबारे स्थालगत अनुगमन गरेको हो ।
जिल्ला समन्वय समितिका प्रमुख ज्ञानेन्द्रकुमार चौधरी नेतृतवको टोलीले राप्तीसोनारी अन्र्तगत गुलरी–ढलैया, जलालाघाट र टिकुलीपुर घाटको अनुगमन गरेको हो ।
अनुगमनका क्रममा मापदण्ड विपरित मनोमानी ढंङ्गले नदीको बहाब नै परिवर्तन गरि ग्राभेल बालुवा खनेको, खोलामा धेरै हैभी इक्युभमेन्टको प्रयोग गरी अबैध उत्खनन गरेको, अबैध तरिकाले बढी गहिराई खनेको लगायत भेटिएको समन्वय प्रमुख चौधरीले बताउनुभयो ।
सबै खोलामा अहिले अबैध तरिकाले मापदण्ड विपरित नदीजन्य पदार्थको उत्खनन भईरहेकोले त्यसको नियन्त्रण तथा कारवाहीका लागि पहल गरेको उहाँले बताउनुभयो । अबैध उत्खननको नियन्त्रणका लागि स्थानीय तहको वढी भुमिका भएपनि गाउँपालिकाले खासै चासो नदिएर अबैध उत्खननको कार्य बढेको प्रमुख चौधरी बताउनुहुन्छ ।
उहाँले अबैध उत्खननको कार्य रोक्न स्थानीय प्रहरी प्रशासन र स्थानीय तहको ध्यानाकर्षण गराएको बताउनुभयो ।
राप्ती नदी र विभिन्न खोलाबाट नदीजन्य पदार्थको अवैध उत्खनन कार्य बढेको छ भने गाउँपालिका क्षेत्रमा रहेका घाट र क्रसर उद्योगलाई नियमन गर्नुपर्ने स्थानीयको माग रहेको छ ।
नदीजन्य पदार्थ उत्खननको ठेक्का पाएका कम्पनीले जथाभावी रुपमा मनोमानी अबैध तरिकाले नदीजन्य पदार्थको उत्खनन गरेको पाइएको छ । अनुगमन टोलीमा समन्वय समितिका पदाधिकारी र कर्मचारीहरुको सहभागिता रहेको थियो ।
