नेपालगन्ज उद्योग वाणिज्य संघको नयाँ कार्यसमिति निर्वाचित गर्न आगामी भाद्र १ गते निर्वाचन हुने भएका छन् । संघका महासचिव भीम बहादुर रानाभाटले संघको कार्यसमिति बैठकले साधारणसभा तथा अधिवेशको मिति तय गरेको जानकारी दिए ।
यसअघि संघमा विशेष कारण देखाउँदै ६ महिना अवधी लम्ब्याउने गरिएपनि यसपटक कार्यसमितिको कार्यकाल थप नगरी निर्वाचनमा जाने निर्णय भएको हो ।
‘२०८० भाद्र २ गते भएको निर्वाचनबाट वर्तमान कार्यसमिति निर्वाचित भएकाले आगामी भाद्र १ गते नयाँ कार्यसमिति निर्वाचनको मिति तय गरेका हौं’, महासचिव रानाभाटले भने ।
महासचिव रानाभाटका अनुसार, संघको ३४ औं र ३५ औं बार्षिक साधारणसभा पनि यसै महिनाको अन्त्य साउन ३० गते गर्ने निर्णय संघले गरेको जानकारी दिए । ‘निर्वाचन घोषणासँगै नयाँ सदस्यता अब वितरण हुने छैन, पुराना सदस्यको हकमा नविकरणका लागि एक साता म्याद राखिएको छ’, महासचिव रानाभाटले भने, ‘त्यसपछि संघमा रहेका कुल व्यवसायी मतदाताको संख्या एकिन हुनेछ ।’
