भदौ १ देखि शल्यक्रियासहित सुरक्षित प्रसूति सेवा सञ्चालनको तयारी
बाँकेको राप्तीसोनारी अस्पतालमा विशेषज्ञ स्वास्थ्य सेवा विस्तार हुने भएको छ । लुम्बिनी प्रदेश सरकारको स्वास्थ्य मन्त्रालय र निक साइमन्स इन्स्टिच्युटबीच ग्रामीण स्वास्थ्य प्रणाली सुदृढीकरण परियोजना कार्यान्वयनसम्बन्धी समझदारी पत्रमा हस्ताक्षर भएसँगै अस्पतालमा विशेषज्ञ चिकित्सकीय सेवा तथा शल्यक्रियामार्फत सुरक्षित प्रसूति सेवा सञ्चालन गर्ने प्रक्रिया औपचारिक रूपमा अघि बढेको हो ।
सम्झौताअनुसार, राप्तीसोनारी अस्पतालमा विशेषज्ञ चिकित्सकको सेवा विस्तार गरिनेछ । आमा सुरक्षा कार्यक्रमअन्तर्गत शल्यक्रियामार्फत सुरक्षित प्रसूति सेवा पनि सुरु हुनेछ । सेवा सञ्चालनमा आएपछि जटिल प्रसूति भएका गर्भवती महिलाले सामान्य शल्यक्रियाका लागि नेपालगन्ज वा अन्य अस्पताल पुग्नुपर्ने बाध्यता उल्लेखनीय रूपमा घट्ने अपेक्षा गरिएको छ ।
अस्पताल प्रशासनका अनुसार, सेवा सञ्चालनका लागि आवश्यक तयारी अन्तिम चरणमा पुगेको छ । विशेषज्ञ जनशक्तिको व्यवस्थापन, आवश्यक उपकरण जडान, पूर्वाधार सुदृढीकरण तथा प्राविधिक तयारीलाई तीव्र बनाइएको छ । आगामी भदौ १ गतेदेखि सेवा सञ्चालन गर्ने लक्ष्यका साथ बाँकी काम अन्तिम चरणमा पुगेको अस्पतालले जनाएको छ ।
ग्रामीण स्वास्थ्य प्रणाली सुदृढीकरण परियोजनाले राप्तीसोनारी गाउँपालिकाका बासिन्दामात्र होइन, आसपासका क्षेत्रका नागरिकलाई पनि आफ्नै नजिकबाट विशेषज्ञ स्वास्थ्य सेवा उपलब्ध गराउने विश्वास गरिएको छ । विशेषगरी मातृ तथा नवजात शिशुको स्वास्थ्य सुरक्षामा सुधार आउने, समयमै उपचारको पहुँच बढ्ने र सुरक्षित मातृत्व कार्यक्रम थप प्रभावकारी हुने अपेक्षा गरिएको छ ।
स्थानीय तह, प्रदेश सरकार र विकास साझेदारबीचको सहकार्यमा अघि बढाइएको यो परियोजनालाई ग्रामीण स्वास्थ्य प्रणाली सुधारतर्फको महत्वपूर्ण उपलब्धिका रूपमा हेरिएको छ। परियोजनाले स्थानीय नागरिकलाई सहज, सुलभ, गुणस्तरीय र भरपर्दो स्वास्थ्य सेवा उपलब्ध गराउँदै स्वास्थ्य सेवाप्रति नयाँ विश्वास स्थापित गर्ने अपेक्षा गरिएको छ।
ग्रामीण स्वास्थ्य प्रणाली सुदृढीकरण परियोजना कार्यान्वयनका लागि लुम्बिनी प्रदेश सरकार, स्वास्थ्य मन्त्रालय र निक साइमन्स इन्स्टिच्युटबीच समझदारी पत्रमा हस्ताक्षर भएको हो। समझदारी पत्रमा हस्ताक्षर भएसँगै परियोजना कार्यान्वयनको औपचारिक प्रक्रिया सुरु भएको छ ।
समझदारी पत्र हस्ताक्षर कार्यक्रममा राप्तीसोनारी गाउँपालिकाका अध्यक्ष तप्तबहादुर पौडेल, अस्पताल विकास समितिका अध्यक्ष तथा गाउँपालिकाका प्रवक्ता मिनराज खड्का र निक साइमन्स इन्स्टिच्युटका प्रतिनिधिहरूको सहभागिता रहेको थियो । उनीहरूले परियोजनामार्फत ग्रामीण क्षेत्रमा विशेषज्ञ स्वास्थ्य सेवा विस्तार हुनु स्थानीय नागरिकका लागि महत्वपूर्ण उपलब्धि हुने विश्वास व्यक्त गरेका थिए ।
लुम्बिनी प्रदेश सरकारले बाँकेको राप्ती सोनारी, रोल्पाको थवाङ र कपिलबस्तुमा यो परियोजना कार्यान्वयनमा ल्याउने भएको हो ।
यसले आफ्नो पालिकामा स्वास्थ्यकर्मीको क्षमता अभिवृद्धिसँगै गुणस्तरिय सेवा प्रवाह हुने विश्वास अध्यक्ष पौडेलको छ । ‘यससँगै गाइनो, नाक कान घाँटी, बालरोग र छालारोग सम्बन्धी विशेषज्ञ सेवाका लागि पनि हामीले काम अघि बढाएका छौं,’ अध्यक्ष पौडेलले दैनिक नेपालगन्जसँग भने ।
राप्तीसोनारीका जनस्वास्थ्य अधिकृत रामचन्द्र वलीले स्तरिय जनशक्तिसँगै उपकरणसमेतको उपलब्धताले स्वास्थ्यसेवामा निकै सहज हुने अपेक्षा गरिएको बताए । पालिकाका निमित्त स्वास्थ्य शाखा प्रमुखसमेत रहेका वलीले दैनिक नेपालगन्जसँग भने, ‘यसले मुख्यगरि मातृ शिशु सुरक्षामा थप सुनिश्चितता ल्याउने छ । वलीका अनुसार, राप्तीसोनारीमा ५० प्रतिशत प्रसुति शल्यक्रियाबाट हुने गरेकोले पनि भेरी अस्पताल पुग्नुपर्ने बाध्यता छ ।
