करिब तीन महिनाअघि २ लाख ५ हजार रुपैयाँ लगानीबाट सुरु भएको नेपालगन्जको कारकाँदोस्थित श्रीदेवी डिटक्स सेन्टरमा अहिले सेवाग्राहीको चाप उल्लेख्य बढेको छ ।
सुरुवातमा दैनिक १५–१६ जना सेवाग्राही आउने सेन्टरमा अहिले केही दिन २०० जनाभन्दा बढी पुग्ने गरेका छन् । सेवाग्राही बढेसँगै सेन्टरको लगानी पनि ६–७ लाख रुपैयाँसम्म पुगेको सञ्चालिका गीता कोइरालाले बताइन् ।
सानो कोठाबाट एक्लै सुरु गरेको व्यवसायमा अहिले ४–५ जना कर्मचारी थपिएका छन् । दैनिक आउने सेवाग्राहीको संख्या बढेपछि सबैलाई सहज रूपमा सेवा दिन अग्रिम अपोइन्टमेन्टको व्यवस्था गरिएको कोइरालाले बताइन् । ‘सुरुमा दैनिक १५–१६ जना सेवाग्राही आउनुहुन्थ्यो । अहिले केही दिन २०० जनाभन्दा बढी आउनुहुन्छ,’ उनले दैनिक नेपालगन्जसँग भनिन् ।
सेन्टरमा ३० मिनेटको फुट डिटक्स थेरापी मुख्य सेवाका रूपमा दिइन्छ । नुन मिसाइएको तातो पानीमा विशेष उपकरण प्रयोग गरेर यो सेवा सञ्चालन गरिन्छ । शरीरलाई हल्का महसुस गराउने, थकान कम गर्न सहयोग गर्ने र समग्र वेलनेसमा सकारात्मक प्रभाव पार्ने विश्वासका कारण सेवाग्राही आकर्षित भएको कोइरालाको भनाइ छ ।
फुट डिटक्सका क्रममा प्रयोग हुने पानीमा केमिकल हालिने गरेको भन्ने चर्चा बजारमा हुने गरे पनि आफ्नो सेन्टरमा त्यस्तो नगर्ने उनले स्पष्ट पारिन् । ‘हाम्रो सेन्टरमा पानीमा केमिकल प्रयोग हुँदैन । नुन मात्र प्रयोग गर्छौं,’ कोइरालाले भनिन् ।
सेवा लिने क्रममा पानीको रङ परिवर्तन हुने विषयमा पनि सेवाग्राहीले विभिन्न जिज्ञासा राख्ने गरेका छन् । कोइरालाका अनुसार, शरीरको अवस्थाअनुसार पानीको रङ फरक–फरक देखिन सक्ने अनुभव सेवाग्राहीले सुनाउने गरेका छन् ।
विशेषगरी ग्यास्टिक, शरीर भारी हुने, खुट्टा झमझमाउने र थकानजस्ता समस्या लिएर मानिसहरू सेन्टरमा आउने गरेको उनले बताइन् । पछिल्लो समय तौल घटाउन चाहने महिला सेवाग्राहीको संख्या पनि उल्लेख्य रहेको उनको भनाइ छ । सेन्टरमा कार्डियो व्यायामसँगै वेलनेससम्बन्धी अन्य सेवा पनि उपलब्ध छन् ।
सेन्टरको सेवा लिएका रुकुमका केशरबहादुर खत्रीले भने श्रीमतीको उपचारका लागि नेपालगन्ज आएका बेला आफूले पनि फुट डिटक्स सेवा लिएको बताए । उनका अनुसार सेवा लिएपछि एक सातामा करिब ४ केजी तौल घटेको थियो । सास फेर्न सहज भएको र पेटको समस्या तथा हातखुट्टा सुनिने समस्या पनि कम भएको उनले अनुभव सुनाए ।
‘विभिन्न अस्पतालमा उपचार गराएँ । औषधि पनि खाएँ । अन्य उपचार विधि पनि अपनाएँ । तर अपेक्षित सुधार भएन । त्यसपछि यहाँको सेवा लिएँ,’ खत्रीले भने । उनले सेवा लिएपछि आफूले अनुभव गरेको परिवर्तनका कारण यसप्रति चासो बढेको बताए ।
सेवाग्राहीको सन्तुष्टि र मुखैमुख फैलिएको प्रचारले सेन्टरको विस्तारमा महत्वपूर्ण भूमिका खेलेको कोइरालाको भनाइ छ । सुरुवातको तुलनामा सेवाग्राहीको संख्या बढ्दै गएपछि व्यवसायलाई थप व्यवस्थित बनाउने प्रयास भइरहेको उनले बताइन् ।
आर्थिक अवस्था कमजोर भएका केही व्यक्तिलाई सेन्टरले निःशुल्क सेवा पनि दिँदै आएको छ । सेवाग्राहीको आवश्यकता र बढ्दो चापलाई ध्यानमा राखेर कोइरालाले सेन्टरसँगै ब्युटी पार्लर सेवा पनि सञ्चालनमा ल्याएकी छन् । एउटै स्थानबाट थप सेवा लिन सकिने भएपछि सेवाग्राहीलाई सुविधा पुग्ने उनको विश्वास छ ।
सेन्टरको सेवा विस्तारसँगै भविष्यमा आधुनिक उपकरण थप्ने योजना पनि कोइरालाले अघि सारेकी छन् । वेलनेससम्बन्धी सेवा थप गर्दै जाने तयारीमा रहेकी उनले स्वास्थ्यप्रति सचेत रहन र नियमित रूपमा शरीरको हेरचाह गर्न सेवाग्राहीलाई आग्रह गरेकी छन् ।
‘सेवाग्राहीको विश्वास नै हाम्रो व्यवसायको सबैभन्दा ठूलो पूँजी हो,’ कोइरालाले भनिन् । त्यही विश्वास कायम राख्दै आगामी दिनमा सेवा र सुविधा थप गर्दै जाने उनको भनाइ छ ।
