अविरल वर्षासँगै रुख ढल्दा बाँकेको डुडुवा गाउँपालिका क्षेत्रमा विद्युत् सेवा प्रभावित भएको छ । गाउँपालिकाको जंगलभित्र रुख ढलेर ८ वटा विद्युत् पोल भाँचिएका छन् । पोल भाँचिएपछि डुडुवा गाउँपालिकाको जब्दहवा क्षेत्रमा आइतवार दिनभर विद्युत् आपूर्ति बन्द भएको छ ।
नेपाल विद्युत् प्राधिकरण नेपालगन्ज वितरण केन्द्रका अनुसार, भाँचिएका पोल फेरेपछि अबेररातीदेखि जब्दहवा क्षेत्रमा विद्युत् सेवा सञ्चालन गरिएको वितरण केन्द्र प्रमुख सञ्जयकुमार मिश्रले जानकारी दिए । ‘८ वटा पोल भाँचिएकाले मर्मत तथा पोल बदलीको काम पूरा गरेर उक्त क्षेत्रमा विद्युत् आपूर्ति सुचारु गरिएको छ,’ मिश्रले दैनिक नेपालगन्जसँग भने ।
अविरल वर्षाका कारण बाँकेका अन्य विभिन्न स्थानमा पनि विद्युत् सेवा प्रभावित भएको वितरण केन्द्रले जनाएको छ । वर्षाका कारण केही क्षेत्रमा विद्युत् आपूर्तिमा समस्या देखिए पनि नेपालगन्जका अन्य क्षेत्रमा भने विद्युत् सेवा नियमित रहेको केन्द्रले जनाएको छ ।
वर्षा निरन्तर भइरहेका कारण विद्युत् संरचनामा थप क्षति पुग्न सक्ने भएकाले वितरण केन्द्रले प्रभावित क्षेत्रमा मर्मत तथा पुनःस्थापनाको कामलाई प्राथमिकतामा राखेको जनाएको छ । ‘सेवा तत्काल सुचारुका लागि हाम्रो प्राविधिक टिम परिचालित छ,’ मिश्रले भने ।
