लुम्बिनी प्रदेश सरकारले आगामी आ.व. २०८३/०८४ का लागि प्रदेशका १२ जिल्लामा एक हजार बढी खानेपानी आयोजनाका लागि बजेट विनियोजन गरेको छ । जिल्लामा रहेका खानेपानी तथा सरसफाई डिभिजन कार्यालय मार्फत प्रदेश सरकारले १ हजार ३० बढी खानेपानी आयोजनाका लागि बजेट विनियोजन गरेको
छ ।
चालु आ.व.का लागि प्रदेश सरकारले बाँकेमा ५० बढी खानेपानी आयोजनाका लागि बजेट विनियोजन गरेको प्रदेश सरकारको बार्षिक कार्यक्रममा उल्लेख छ । खानेपानी तथा सरसफाई डिभिजन कार्यालय मार्फत कार्यान्वयन हुने गरी गरी ५० बढी योजनाका लागि प्रदेश सरकारले बजेट विनियोजन गरेको हो ।
प्रदेश सरकारले बाँकेमा तराई–मधेश खानेपानी सुधार कार्यक्रम अन्तर्गतका क्रमागत तथा अधुरा खानेपानी आयोजनाहरू कार्यान्वयन गर्नका लागि १ करोड १० लाख रूपैयाँ विनियोजन गरेको
छ ।
त्यस्तै, जलवायु अनुकलित बृहत खानेपानी आयोजना अन्तर्गतका क्रमागत तथा अधुरा खानेपानी आयोजनाहरू कार्यान्वयन गर्न ५० लाख, माग अनुसार विभिन्न खानेपानी आयोजना मर्मत सुधार तथा बिस्तारका लागि ३५ लाख, डुडुवा गाउँपालिका वडा नं. ३, ४ र ६ मा सानो ट्युबेल जडानका लागि ९ लाख, जानकी गाउँपालिका वडा नं. ३ मा खानेपानी धारा जडानका लागि ६ लाख, गरिब विपन्न समुदायलाई डुडुवामा खानेपानी धारा जडानका लागि १२ लाख प्रदेश सरकारले विनियोजन
गरेको हो ।
लुम्बिनी प्रदेशमा खानेपानी आयोजनाको विस्तारसँगै लाभान्वित घरधुरीको संख्या बढ्दै गएको छ । प्रदेश सरकारले सार्वजनिक गरेको आर्थिक सर्वेक्षण २०८२÷८३ अनुसार, गत आर्थिक वर्षको चैत मसान्तसम्म थप ५२ वटा खानेपानी आयोजना मात्रै सम्पन्न भएका थिए । आयोजनालाई बजेट विनियोजन गर्ने र कार्यान्वयन नहुने, ढिलासुस्ती हुने गरेको प्रदेश सरकारको गत आ.व.को पूँजीगत बजेट खर्चबाट देखिन्छ ।
यद्यपि, आर्थिक वर्ष २०८१÷८२ को असार मसान्तसम्म प्रदेशमा ५ सय ४९ वटा खानेपानी आयोजना सम्पन्न भइसकेका थिए । ती आयोजनाबाट १ लाख ८४ हजार ७ सय ५८ घरधुरी लाभान्वित भएका थिए । गत आर्थिक वर्षको चैत मसान्तसम्म सम्पन्न थप ५२ आयोजनाबाट १३ हजार ९ सय ४२ घरधुरी थप लाभान्वित
भएका छन् ।
सर्वेक्षणअनुसार आर्थिक वर्ष २०८१÷८२ को असार मसान्तसम्म प्रदेशमा १ हजार २ सय ५४ वटा फेरोसिमेन्ट टङ्की र १ हजार ७ सय ६० वटा आरसीसी पानी टङ्की निर्माण सम्पन्न भएका थिए ।
गत आर्थिक वर्षको चैत मसान्तसम्म थप ६८ वटा फेरोसिमेन्ट र १ सय २१ वटा आरसीसी पानी टङ्की निर्माण भएका छन् ।
त्यस्तै, प्रदेश स्थापना भएदेखि आर्थिक वर्ष २०८१/८२ को असार मसान्तसम्म इन्टेक, डिप बोरिङ र लिफ्ट खानेपानीका सम्पवेल क्रमशः १ हजार ५ सय १२, ४ सय ३५ र २ सय १ वटा निर्माण सम्पन्न भएका थिए ।
गत आर्थिक वर्ष २०८२÷८३ को चैत मसान्तसम्म थप १ सय ७ वटा इन्टेक, २२ वटा डिप बोरिङ र ३ वटा लिफ्ट खानेपानीका सम्पवेल निर्माण सम्पन्न भएको आर्थिक सर्वेक्षणमा उल्लेख
छ ।
