प्याब्सन बाँकेको नेतृत्व गर्ने भनेर उम्मेदवारी दर्ता गराउनु भएको छ । यसका आधारहरु के के हुन् ?
लगभग १७ वर्षजति मैले प्याब्सनको जिल्ला कार्यसमिति नगर कार्यसमितिमा रहेँ । जिल्ला प्याब्सनको सदस्य सहसचिव कोषाध्यक्ष सचिव प्रदेश सदस्य हुँदै दुई कार्यकाल नगर अध्यक्ष भइसकेपछि यो १७ वर्षको अवधिमा मेरो नेतृत्वको विकास पनि भइरहेको थियो । प्याब्सनलाई मैले नजिकबाट बुझेको छु त्यो भइरहेका कारणले पनि मैले अध्यक्षमा उम्मेदवारी गरेको हो ।
निर्वाचनमै जानुपर्ने अवस्था किन आयो ?
सकेसम्म प्रयास त अहिले पनि सर्वसम्मतिकै भइरहेको छ । अग्रजहरूसँग सरसल्लाह भइरहेको छ । सर्वसम्मत भइहाल्छ कि भन्ने पनि अझैसम्म आशा छ । तर त्यो भएन भने प्रजातान्त्रिक प्रक्रिया अनुसार निर्वाचनमा जाने भन्ने कुराहरू पनि भइरहेको छ ।
नेतृत्वमा आउने इच्छा सबैलाई हुन्छ कसैलाई नआइज भन्ने कुरा पनि भएन, मलाई पनि बस्नुस् भन्न गाह्रो अर्को साथीलाई पनि बस्नुस् भन्न गाह्रो । अझै पनि सकेसम्म सहमति हुन्छ कि भन्ने आश छ ।
यसअघि जस्तो सहमति हुन नसक्नु के पार्टी राजनीति सुरु भएको हो प्याब्सनमा ?
त्यस्तो त होइन । साथीभाइ को कसको नजिक छ भन्ने एउटा कुरा हुन सक्ला तर प्रत्यक्ष रूपमा पार्टी राजनीति भएको जस्तो मलाई लाग्दैन ।
यो बेला हामीले उठाउने व्यवसायिक मुद्दा के होला ?
यो बेला हामीले उठाउने व्यवसायिक मुद्दा भनेको संस्थागत विद्यालयको स्थायित्व, संस्थागत विद्यालयले पाउनुपर्ने अधिकारको विषयनै हो । अहिले जुन शिक्षा ऐन बन्न गइरहेको छ त्यसमा हाम्रो अस्तित्व र स्थायित्व दुईवटै हामीले खोजिरहेका छौँ । मेन हाम्रो एजेन्डा भनेकै शिक्षा ऐनमा हाम्रो अस्तित्व र स्थायित्व हो ।
