प्रतिबन्धित कोडिन सिरपको कारोबार पुनः सुरु भएको दावी
एसके मधेसिया
नेपालसँगको सीमावर्ती भारतनीय बजार रुपैडिहामा प्रतिबन्धित कोडिनयुक्त खोकीको सिरप बरामद भएपछि गरिएको छापामारी र पक्राउ कारबाहीले अवैध कारोबार रोकिएको देखिएको छैन । स्थानीयवासीले छापामा नाम जोडिएका एक दर्जनभन्दा बढी मेडिकल पसल पुनः सञ्चालनमा आएको र प्रतिबन्धित सिरपको बिक्रीसमेत फेरि सुरु भएको आरोप लगाएका छन् ।
स्थानीयका अनुसार कारबाहीपछि ती मेडिकल पसल दुई–तीन दिन मात्र बन्द भए। त्यसपछि पुनः सञ्चालनमा आए । अहिले पनि ती पसलमा भारत र नेपालका युवाको भीड लाग्ने गरेको उनीहरूको दाबी छ । प्रतिबन्धित कोडिनयुक्त सिरप पहिलेकै शैलीमा बिक्री भइरहेको आरोप उनीहरूले लगाएका छन् ।
यसअघि रुपैडिहाबाट लाखौं रुपैयाँ बराबरको प्रतिबन्धित कोडिनयुक्त सिरप बरामद भएपछि पक्राउ परेका अभियुक्तको बयानका आधारमा बहराइच शहरमा पनि छापामारी गरिएको थियो । सो क्रममा शिवांश मेडिकल स्टोरबाट एउटा लेजर बुक बरामद भएको थियो । उक्त लेजरमा रुपैडिहाका धेरै मेडिकल स्टोर सञ्चालक तथा खरिदकर्ताको नाम र ठेगाना उल्लेख रहेको तथ्य सार्वजनिक भएको थियो ।
यति धेरै प्रमाण फेला परे पनि अनुसन्धानमा नाम आएका मेडिकल पसलविरुद्ध प्रभावकारी कारबाही किन अघि बढ्न सकेन भन्ने प्रश्न स्थानीयले उठाएका छन् । समयमै कडा कदम नचालिए भारत–नेपाल सीमाक्षेत्रमा लागुऔषधजन्य औषधिको अवैध कारोबार अझ फैलिने उनीहरूको चिन्ता छ ।
एक स्थानीयले दैनिक नेपालगन्जसँग भने, ‘कारबाहीपछि पसल दुई–तीन दिन बन्द भए । त्यसपछि फेरि खुले । अहिले पनि भारत र नेपालका युवाको भीड ती पसलमा देखिन्छ । प्रतिबन्धित सिरपको बिक्री रोकिएको देखिएको छैन ।’
प्रतिबन्धित कोडिनयुक्त सिरप ठूलो परिमाणमा बरामद भएपछि देवीपाटन मण्डलका प्रहरी उपमहानिरीक्षक अशोक कुमार शुक्लले आफैं घटनाको समीक्षा गरेका थिए । उनले बहराइच प्रहरी र रुपैडिहा प्रहरीलाई लागुऔषधजन्य औषधिको अवैध कारोबारमा संलग्न व्यक्तिविरुद्ध कडा कारबाही गर्न निर्देशन दिएका थिए ।
गत असार १८ गते स्थानीय प्रहरी कार्यालयमा आयोजित बैठकमा उनले ठूलो परिमाणमा नशालु औषधि सीमावर्ती क्षेत्रमा पुग्नु गम्भीर विषय भएको उल्लेख गर्दै यसको प्रभावकारी नियन्त्रणमा लाग्न प्रहरी अधिकारीलाई स्पष्ट निर्देशन दिएका थिए । तर स्थानीयवासीका अनुसार, ती निर्देशनपछि पनि प्रतिबन्धित औषधिको अवैध कारोबार पूर्ण रूपमा रोकिएको छैन ।
त्यसैले प्रहरी र औषधि विभागले संयुक्त अभियान सञ्चालन गरी दोषीमाथि कडा कारबाही गर्नुपर्ने माग उनीहरूले गरेका छन् । उनीहरूको भनाइमा नेपालसँगको भारतीय सीमामा फैलिएको नशालु औषधिको सञ्जाल नियन्त्रण गर्न प्रभावकारी र निरन्तर कारबाही अपरिहार्य छ ।
