बाँकेमा सडक क्षेत्र बढ्दै गएको छ । जिल्लामा सडक क्षेत्र बढ्दै जाँदा ट्राफिक प्रहरीको आवश्यकता पनि बढ्दै गएको छ । तर, जिल्लामा २४ जना ट्राफिक प्रहरीको मात्रै दरबन्दी रहेको छ भने हाल काज सहित ६० जनाको जनशक्ति रहेको छ ।
जिल्लामा ट्राफिकको संख्या पर्याप्त नहुँदा ट्राफिक व्यवस्थापन पनि चुनौति बन्दै गएको छ ।
‘हामीसँग भएको जनशक्तिलाई परिचालन गरेर ट्राफिक व्यवस्थापन गर्दै आएका छौं’, जिल्ला ट्राफिक प्रहरी कार्यालय बाँकेका प्रमुख, प्रहरी निरीक्षक कनक बहादुर शाहीले भने ।
जिल्ला ट्राफिक प्रहरी कार्यालय बाँकेले आर्थिक वर्ष २०८२÷०८३ मा ट्राफिक व्यवस्थापन, सडक सुरक्षा र दुर्घटना न्यूनीकरणका क्षेत्रमा विभिन्न प्रभावकारी
कार्यक्रम सञ्चालन गरेको जनाएको छ ।
कार्यालय प्रमुख शाहीका अनुसार, बाँकेमा ६ वटा अटोमेटिक नम्बरप्लेट रिकग्नाइजेसन क्यामेरा (एएनपीआर) क्यामेरा जडान गरिएको छ । बाँकेबाट सञ्चालन हुने २२ वटा ई–ड्राइभ सवारीमा एसओएस बटन तथा ३६ वटा लामो दूरीका बसमा सीसीटीभी क्यामेरा र ड्यासक्याम जडान गरिएको उनले बताए ।
दुई चरणमा २ हजार ७ सय १९ वटा सवारी साधनमा नम्बर प्लेट पुनर्लेखन गरिएको छ भने विभिन्न सवारीबाट १ हजार ८ सय अवैध ग्याप सिट हटाएर कारबाही गरिएको छ । सडक सुरक्षाका लागि १ सय ५० वटा ट्राफिक सचेतनामूलक बोर्ड राखिएको र करिब १५ स्थानमा जेब्रा क्रसिङ निर्माण सुरु गरिएको कार्यालयले जनाएको छ ।
‘नेपालगन्ज उपमहानगरपालिका सँगको समन्वयमा ई–रिक्सा व्यवस्थापन अभियान सञ्चालन गरिएको छ । अभियानअन्तर्गत दैनिक पाँच सय भन्दा बढी अटो चेकजाँच, सूचीकरण, क्यूआर कोड प्रणालीको तयारी तथा नाबालक र गैरनेपाली चालकमाथि निगरानी बढाइएको छ । अवैध रूपमा सञ्चालनमा रहेका ९ सय ३९ वटा ई–रिक्सामाथि कारबाही गरिएको छ’, जिल्ला ट्राफिक प्रहरी कार्यालय बाँकेले दिएको जानकारीमा उल्लेख छ ।
ट्राफिक प्रहरीका अनुसार, गत आ.व.मा लागूऔषध सेवन गरेको आशंकामा २५ चालकको परीक्षण गर्दा १४ जना पोजिटिभ भेटिएका थिए । साथै ५९ वटा मोडिफाइ गरिएको मोटरसाइकलका साइलन्सर नियन्त्रणमा लिइएको, नम्बर प्लेट परिवर्तन गरी सञ्चालन गरिएका १७ वटा ईभी सवारीलाई कारबाहीका लागि पठाइएको तथा ९० वटा ईभी सवारीलाई ट्राफिक कारबाही गरिएको छ ।
त्यस्तै, २ सय ३५ वटा म्याजिक भ्यानबाट यात्रु झुन्ड्याउने फलामे डण्डी हटाइएको, ओभरलोड तथा भवरलोड बोकेका १९ वटा ट्रकलाई कारबाहीका लागि पठाइएको, २ सय ३० वटा सवारी साधनको यान्त्रिक परीक्षण गरिएको तथा करिब २ सय ४० जना सार्वजनिक सवारी चालक तथा सहचालकको स्वास्थ्य परीक्षण गरिएको कार्यालयले जनाएको छ ।
ट्राफिक सचेतनालाई पनि प्राथमिकता दिँदै १५ दिने लेन अनुशासन अभियान सञ्चालन गरी ३ हजार ८ सय चालकलाई सचेत गराइएको, दुई पटक नागरिक सुनुवाइ, ई–रिक्सा चालकलाई निःशुल्क लाइसेन्स तयारी कक्षा तथा ट्राफिक सचेतना कार्यक्रम सञ्चालन गरिएको छ । साथै २ सय ५ वटा सवारीबाट कालो सिसा र अवैध स्टिकर हटाइएको तथा १ हजार ४ सय ३८ वटा साइकल र अन्य सवारीमा रिफ्लेक्टिभ स्टिकर टाँसिएको छ ।
