विश्व म्याराथनको साझा संस्था एसोसियसन अफ इन्टरनेसनल म्याराथन एण्ड डिस्टेन्स रेस (एम्स)का अध्यक्ष पाको बोराओ नेपालगन्ज आइपुगेका छन् ।
अध्यक्ष बोराओलाई नेपालगन्ज उपमहानगरपालिकाका निवर्तमान उप–प्रमुख उमा थापामगर, नेपालगन्ज उद्योग वाणिज्य संघका महासचिव भिमबहादुर रानाभाट, लुम्बिनी प्रदेश खेलकुद परिषदका पूर्व सदस्य सचिव भिम ओली, धारा नेपालगन्ज म्याराथनका प्रमुख टिएस ठकुरीलगायतले नेपालगन्ज बिमानस्थलमा स्वागत गरे ।
जेठ २१–२३ गतेसम्म राजधानी काठमाडौमा आयोजना गरिएको इन्टरनेसनल रनिङ कन्फ्रेन्स सहभागीमा सहभागी हुन नेपाल आएका बोराओ नेपालगन्ज म्याराथनको आयोजनासंग जोडिएर यहाँको अवस्थिति, नेपालगन्जको बस्तुस्थितिको स्थलगत अध्ययन भ्रमणमा आएका हुन् ।
एम्ससँगको सहकार्यमा रेस नेपाल र नेपालगन्ज म्याराथनले संयुक्त रूपमा आयोजना गरेका हुन्। त्यसको नेतृत्व ठकुरीले गरेका थिए । नेपालगन्जमा म्याराथनका बहुआयामिक विषयबस्तुमा अन्तरक्रिया गरेका अध्यक्ष बोराओले म्याराथन खेलकुद मात्र नभएर उत्सव पनि भएको बताए । ‘म्याराथन केवल दौड मात्रै होइन, उत्सव हो’, नागरिक अगुवाहरू बीचको अन्तरक्रियामा भने, ‘सुरुमा देश लागेर म्याराथनलाई सफल बनाउने हो, पछि म्यारथनले देश बनाउँछ ।’ बोराओ जोड थियो, ‘सिंगो सहर लागेर नेपालगन्ज म्याराथनलाई सफल बनाउनु भयो भने, यसले सिंगो नेपालगन्जलाई बनाउँछ ।’
विश्वका १ सय २० राष्ट्रमा पुगेको एम्सले नेपालगन्जमा धारा–नेपालगन्ज म्याराथनलाई मान्यता दिएको छ । पहिलो पटक नेपाल आएका अध्यक्ष बोराओले आफ्नो देशमा आयोजना गरिने बालेन्सिया म्याराथनबारे जानकारी दिंदै हरेक बर्ष ३५ हजार धावकले सहभागिता जनाउने बताए । ‘ती मध्ये ६५ प्रतिशत विदेशी हुन्छन्’, म्याराथनले पर्यटन व्यवसायलाई निकै ठूलो सहयोग पुग्ने तर्क गर्दै उनले म्याराथनका दृष्टिले निकै ‘पोटेन्सियल ल्याण्ड’ का रूपमा नेपाललाई चर्चा गरे ।
नेपालगन्ज उपमहानगरपालिकाका निवर्तमान उपप्रमुख उमा थापामगरको अध्यक्षतामा भएको कार्यक्रममा नेपालगन्ज म्याराथनको मुख्य प्रायोजक केएल दुगड गु्रपका सिइओ प्रदिप छाजेडलाई एम्स अध्यक्ष बोराओले सम्मान गरेका थिए ।
‘नेपाल खेलकुद् र पर्यटनको उर्वर भूमि हो’
राष्ट्रपति रामचन्द्र पौडेलले नेपाल भ्रमणमा रहेका विश्व म्याराथनको साझा संस्था एसोसिएसन अफ इन्टरनेशनल म्याराथन डिस्टेन्स रेस (एम्स)का अध्यक्ष पाको बोराओलाई एम्सको बोर्ड बैठक नेपालमा राखेकोमा धन्यवाद दिएका छन् ।
राष्ट्रपति पौडेलले नेपाल खेलकुद् र पर्यटनको उर्वर भूमि रहेको बताएका छन् । नेपालमा सगरमाथाको काखमा साहसिक अल्ट्रा म्याराथनदेखि समथल स्थलमा नेपालगन्ज म्याराथनजस्ता लामो दूरीका दौडहरू सफलतापूर्वक भइरहेको उल्लेख गर्दै राष्ट्रपति पौडेलले एम्स प्रतिनिधिसँग प्रोत्साहनका लागि आग्रह गरेका छन् । ‘भौगोलिक विविधता सुहाउँदा दौडले पक्कै पनि खेल पर्यटनमा नयाँ सम्भावनाको ढोका खोल्नसक्छ भन्ने मेरो विश्वास छ । यसमा एम्सजस्ता अन्र्तराष्ट्रिय छाता संगठनहरूले प्रोत्साहन गरुन् भन्ने अपेक्षा छ’ उनले भने । राष्ट्रपति पौडेलले विश्व शान्ति, भाइचारा र सद्भावका लागि खेलको महत्व रहेको उल्लेख गर्दै दौड संस्कृतिले स्वास्थ्य, स्वस्थ प्रतिस्पर्धा र समुन्नत समाजको निर्माणमा मद्दत पुग्ने विश्वास व्यक्त गरे । नेपालमा पनि खेलकुदको विकासका लागि सरकारले बर्षेनी लगानी बढाइरहेको र निजी क्षेत्रबाट पनि आकर्षण बढ्दै गएको बताएका छन् ।
गत २१ र २२ जेठमा एम्सको बोर्ड बैठक पहिलोपटक नेपालमा राखिएको थियो । साथै, २३ जेठमा नेपाल अन्र्तराष्ट्रिय रनिङ कन्फ्रेन्स र शनिबार नेपाल हेरिटेज रन काठमाडौँ २५ के रेस आयोजना गरिएको थियो ।
राष्ट्रपति पौडेलले सो अवसरमा नेपाल हेरिटेज रन काठमाडौँ २५ के रेस महिलातर्फकी उपाधि विजेता सन्तोषी श्रेष्ठलाई बधाईसमेत दिए । नेपालगन्ज म्याराथनका संस्थापक अध्यक्ष टीएस ठकुरीले नेपाल अन्र्तराष्ट्रिय रनिङ कन्फ्रेन्सका निष्कर्षहरू र नेपाल हेरिटेज रेस काठमाडौँ २५ के रेसबारे जानकारी गराएका थिए । सो भेटमा एम्स अध्यक्ष पाको बोराओलगायत बोर्ड सदस्यहरू, नेपालगन्ज म्याराथनका संस्थापकहरू सहभागी थिए ।
