बाँकेको खजुरास्थित सुशील कोइराला प्रखर क्यान्सर अस्पतालमा आवश्यक भौतिक संरचना निर्माणका लागि लुम्बिनी प्रदेश सरकारले बहुवर्षीय योजनामार्फत लगानी गर्ने भएको छ। अस्पतालबाट औपचारिक प्रस्ताव आए आवश्यकता अनुसार प्रदेश सरकार भौतिक पूर्वाधार निर्माणमा सहकार्य गर्न तयार रहेको लुम्बिनी प्रदेश सरकारका भौतिक पूर्वाधार मन्त्री रत्न खत्रीले बताएका छन्।
क्यान्सर अस्पतालको स्थलगत अनुगमनका क्रममा पुगेका मन्त्री खत्रीले अस्पताल प्रशासनलाई आवश्यक संरचनासहितको प्रस्ताव लिएर प्रदेश राजधानी आउन आग्रह गरे। अस्पतालले माग गरेअनुसार बहुवर्षीय योजनामा समेटेर भौतिक संरचना निर्माणमा प्रदेश सरकारबाट लगानी गर्न सकिने उनले बताए।
मन्त्री खत्रीले सुशील कोइराला प्रखर क्यान्सर अस्पताल आफ्नै निर्वाचन क्षेत्रमा पर्ने उल्लेख गरे। बाँकेमा प्रदेश सरकारअन्तर्गत कुनै स्वास्थ्य संस्था नरहेको अवस्थामा क्यान्सर अस्पतालसँग प्रदेश सरकारको सहकार्य आवश्यक रहेको उनको भनाइ थियो। ‘अस्पताल संघीय सरकारअन्तर्गत भए पनि यहाँबाट सबैभन्दा बढी लुम्बिनी प्रदेशका नागरिकले सेवा लिइरहेका छन्। त्यसैले प्रदेश सरकार अस्पतालसँग सहकार्य गर्न तयार छ’, उनले भने।
यसअघि अस्पतालका अधिकारीले प्रदेश सरकारसँग सहकार्यका लागि आवश्यक पहल नगरेका कारण खजुरा क्यान्सर अस्पतालमा प्रदेश सरकारको उपस्थितिसमेत देखिन नसकेको मन्त्री खत्रीले बताए। अब अस्पताल प्रशासनले प्रस्ताव ल्याए प्रदेश सरकारले आवश्यकताका आधारमा सहयोग गर्ने उनको प्रतिबद्धता थियो।
अस्पतालका कार्यकारी निर्देशक डा. निरज भट्टराईले भने सीमित जनशक्ति र स्रोतसाधनका बीच पनि अस्पतालले सेवा विस्तार गर्दै आएको जानकारी दिए। अस्पताल परिसरमा मन्त्री खत्रीलाई स्वागत गर्दै उनले संघीय सरकारको पूर्ण स्वामित्वमा रहेको अस्पतालले स्वीकृत दरबन्दीसमेत पर्याप्त रूपमा प्राप्त गर्न नसकेको बताए।
‘धेरै थोरै जनशक्तिबाट पनि अस्पतालले उत्कृष्ट सेवा दिँदै आएको छ’, डा. भट्टराईले भने, ‘सीमित स्रोतसाधनका बीच काम गरिरहेका छौं।’ उनका अनुसार ४ हजार ६ सय बिरामीलाई सेवा दिएर सुरु भएको अस्पतालले अहिले ४० हजारभन्दा बढी क्यान्सरका बिरामीलाई सेवा दिइरहेको छ।
अस्पतालमा थप जनशक्ति र उपकरण प्राप्त हुने क्रममा रहेको उनले बताए। तर सेवा विस्तारसँगै भौतिक संरचनाको आवश्यकता पनि बढ्दै गएको उनको भनाइ थियो। अस्पताललाई पूर्ण रूपमा सेवा दिन सक्ने अवस्थामा पुर्याउन आवश्यक पूर्वाधारको अभाव प्रमुख चुनौतीका रूपमा रहेको उनले बताए।
लुम्बिनी प्रदेशसहित कर्णाली र सुदूरपश्चिम प्रदेशका क्यान्सरका बिरामीका लागि अस्पताल प्रमुख उपचारस्थल बनेको डा. भट्टराईले बताए। त्यसकारण अस्पतालमा प्रदेश सरकारको उपस्थितिसँगै सहकार्य आवश्यक रहेको उनले औंल्याए।
क्यान्सरका बिरामीको उपचारका लागि लुम्बिनी प्रदेश सरकारले देशभरका प्रदेश सरकारमध्ये सबैभन्दा बढी उपचार खर्च उपलब्ध गराएको भन्दै डा. भट्टराईले प्रदेश सरकारप्रति आभार व्यक्त गरे। अब अस्पतालमा आवश्यक भौतिक पूर्वाधार निर्माणमा पनि प्रदेश सरकारबाट सहयोगको अपेक्षा रहेको उनले बताए।
अनुगमनका क्रममा मन्त्री खत्रीले अस्पतालका विभिन्न कक्षको स्थलगत निरीक्षण गरे। उनले अस्पतालमा आउने नागरिकलाई गुनासो गर्ने अवस्था नआउने गरी सेवा प्रवाह गर्न स्वास्थ्यकर्मी तथा कर्मचारीलाई आग्रह गरे।
अनुगमनका क्रममा अस्पतालका कार्यकारी निर्देशक डा. निरज भट्टराई, बाल क्यान्सर विशेषज्ञ डा. सुवास मेहतासहित अस्पतालका अधिकारीले मन्त्री खत्रीलाई स्वागत गरेका थिए।
